Ինչ պետք է իմանալ. Գույքի ներքին ստուգումների վերականգնում

2022 թ-ի հունիսի 1-ից FEMA-ն վերականգնել է աղետների պատճառած վնասների ստուգումը՝ անձամբ այցելելով տներ և զննումներ իրականացնելով: COVID-19 համաճարակի պատճառով տուժածների տները զննելու համար կիրառվել են բազմաթիվ վիրտուալ մեթոդներ: Աղետից տուժածների առողջությունն ու անվտանգությունը առաջնահերթ են FEMA-ի համար, այնպես որ գործակալությունը կպահպանի զննումներ իրականացնելու հնարավորությունը՝ առանց տուն մտնելու: Եթե տուժածները մտավախություն ունեն՝ COVID-19-ի ընթացիկ անորոշության պատճառով կամ, երբ այլ կերպ հնարավոր չէ տուն մտնել, FEMA-ն կհետևի Հիվանդությունների վերահսկման և կանխարգելման կենտրոնների ուղեցույցներին՝ տան արտաքին վիճակի ստուգում իրականացնելու համար, այդ թվում նաև՝ պահպանելով սոցիալական հեռավորությունը և կրելով անձնական պաշտպանիչ միջոցներ:

Զննման իրականացում

FEMA-ի կողմից տների զննումն իրականացվում է աղետի հետևանքով առաջացած վնասների և կորուստների ստուգման գործընթացի շրջանակներում, ինչպես նաև օգնում է որոշել դիմումատուների համար հասանելի դաշնային օգնության տարբերակները:

Սովորաբար, երբ աղետից տուժածը դիմում է աղետից օգնություն ստանալու համար, FEMA-ի տեսուչը կկապվի նրա հետ մի քանի օրվա ընթացքում՝ հանդիպում նշանակելու համար: Որոշ դեպքերում, դիմումատուի հետ կարող են կապվել դիմելու նույն օրը, բայց սովորաբար՝ դիմելուց հետո 10 օրից ոչ ուշ: Տեսուչի հեռախոսահամարը կարող է լինել նահանգից դուրս կամ զանգահարողի ID-ում կարող է «անհասանելի» ցույց տալ:

Տուժածի պաշտպանության նկատառումներից ելնելով՝ տեսուչը կարող է հեռախոսով հարցնել տուժածի անձը նույնականացնող տվյալները (PII):

Երբ FEMA-ի տեսուչը զանգահարի, գրի առեք հետևյալը․

• Տեսուչի անունը
• Զանգի ամսաթիվը
• Նշանակված հանդիպման օրը և ժամը
• Տեսուչի հեռախոսահամարը

Տեսուչը երեք անգամ՝ տարբեր օրերի և օրվա տարբեր ժամերի կփորձի կապ հաստատել՝ զննումն անցկացնելու համար հանդիպում նշանակելու համար: Եթե հնարավոր չլինի կապ հաստատել տուժածի հետ զննումն իրականացնելու նպատակով հանդիպում նշանակելու համար, դիմելու պահին նշված հասցեով նամակ և/կամ էլեկտրոնային նամակ կուղարկվի:

Եթե ձեզ զանգահարել է FEMA-ի տների զննման տեսուչը, բայց տվյալ ընտանիքից ոչ ոք չի դիմել FEMA-ի աղետների հետ կապված օգնության համար, տվյալ անձը պետք է տեսուչին տեղեկացնի, որ իրենք չեն դիմել FEMA-ի օգնության համար և խնդրի տեսուչին չեղարկել դիմումը: Տվյալ անձը պետք է նաև ծանուցի անմիջապես FEMA-ին՝ զանգահարելով FEMA-ի Օգնության կենտրոն հետևյալ հեռախոսահամարով՝ 800-621-3362 կամ այցելելով FEMA-ի Աղետների պատճառած վնասների վերականգնման կենտրոն:

Զննման ընթացքում

Սովորական զննումը տևում է մինչև 45 րոպե՝ կախված վնասի չափից: Զննումները կարող են կատարվել միայն այն դեպքում, եթե դիմումատուն կամ համատեղ դիմումատուն կարողանում են հանդիպել տեսուչի հետ: Տուժածը կարող է հրավիրել մեկ այլ անձի, օրինակ՝ ընտանիքի անդամին, բարեկամին կամ ընկերոջը, ով կօգնի շփվել տեսուչի հետ:

• Եթե դիմումատուն կամ համատեղ դիմումատուն չեն կարողանում հանդիպել տեսուչի հետ, ապա կարող է գրավոր կերպով նշանակվել և նախապես լիազորվել երրորդ անձ՝ մինչև պլանավորված ժամն ու ամսաթիվը:
• FEMA-ն զննման համար երբեք վճար չի գանձում: Տեսուչը երբեք չի հարցնի բանկային տվյալները:

FEMA-ի տեսուչը զննման շրջանակներում արձանագրում է աղետի կողմից պատճառված վնասը: Տեսուչը չի կարող որոշել, թե արդյոք տուժածն իրավասու է օգնության համար, թե ոչ:

• Զննման ընթացքում տեսուչը կփորձի ստուգել դիմումատուի անունը, հասցեն, կոնտակտային տվյալները, բնակության և սեփականատիրության իրավունքի կարգավիճակը և ապահովագրական ծածկույթի մասին տեղեկությունները:
• Տեսուչը կշրջի ամբողջ տան միջով, որպեսզի գնահատի և վնասված, և չվնասված տարածքների վիճակը՝ նշելով անշարժ գույքին (կառուցվածքային) աղետի կողմից պատճառած վնասը և կկատարի ամբողջ վնասված և չվնասված կարևորագույն անձնական գույքի (կենցաղային տեխնիկա, կահույք և այլն) գույքագրում:
• Տեսուչը հարցեր կտա աղետի պատճառով առաջացած կորուստների և ծախսերի մասին, այդ թվում նաև՝ բժշկական ծախսերի, տեղափոխման և պահեստավորման ծախսերի, աղետի հետևանքով գնված իրերի, համազգեստների, պարագաների և դպրոցի կամ աշխատանքի համար անհրաժեշտ գործիքների մասին:
• Տեսուչները չեն բարձրանա տանիքներ կամ չեն մտնի նկուղային տարածքներ:
• Զննման ընթացքում կարող են լուսանկարվել տան ներքին և արտաքին հատվածները:
• Այն դեպքերում, երբ տունը հասանելի չէ, տեսուչը կարող է հանդիպել տուժածի հետ այլ վայրում՝ անձի ինքնությունը, բնակության և/կամ սեփականատիրության իրավունքը ստուգելու համար:
• Եթե կասկածում եք, որ ձեզ այցելած անձը տեսուչը չէ, խնդրեք նրան անհապաղ հեռանալ և զանգահարեք տեղական իրավապահ մարմիններին:

Եթե FEMA-ն չկարողանա ստուգել դիմումատուի մինչև աղետը գոյություն ունեցող տան սեփականատիրության կամ բնակության իրավունքը (բնակությունը) նախքան զննումը, տեսուչը կխնդրի փաստաթղթերը՝ կլինեն թղթային, թե թվային տարբերակով, որոնք կտրամադրեն բնակության և/կամ սեփականատիրության իրավունքի ապացույցները: Ստուգման փաստաթղթերի օրինակներ են համարվում տան սեփականության վկայականը/սեփականության իրավունքը կամ սեփականության ապահովագրության ապացույցը, կոմունալ վճարների կամ վարկային քարտի հաշիվը, վարորդական վկայականը կամ ընտրողի գրանցման քարտը կամ գույքահարկի վճարային հաշիվը:

Խնդրում ենք նկատի ունենալ. Տուժածներին կարող է մի քանի տեսուչ այցելել, օրինակ՝ FEMA-ի Որակի վերահսկողության տեսուչը կամ ԱՄՆ Փոքր բիզնեսների վարչության (SBA) ներկայացուցիչները կամ Ջրհեղեղից ապահովագրության ազգային ծրագրի կարգավորողները:

Արդյունավետ շփումն ապահովելու համար կտրամադրվեն խելամիտ միջոցներ, այդ թվում նաև՝ թարգմանիչներ և ժեստերի լեզվի (ASL) թարգմանիչներ, որոնք կապահովեն արդյունավետ հաղորդակցումն անգլերենի սահմանափակ իմացությամբ տուժածների, հաշմանդամություն ունեցող անձանց և դեպի տուն հասանելիության և գործառնական կարիքներ ունեցող անձանց հետ:

Եթե տուժածներն օգտվում են տեսահաղորդման ծառայությունից, ենթագրերով հեռախոսային ծառայությունից կամ հաղորդակցման այլ ծառայություններից, խնդրում ենք տրամադրել FEMA-ին այդ ծառայության համար նշանակված հատուկ համարը: Zoom-ի կամ FaceTime-ի միջոցով հաղորդակցվելու դեպքում դիմումատուն կամ համատեղ դիմումատուն կարող է պահանջել թարգմանիչ FaceTime-ի միջոցով կամ թարգմանիչ և ենթագրերի ապահովում Zoom-ի միջոցով:

Հետզննում

Զննման ընթացքում արձանագրված տեղեկությունները FEMA-ի կողմից օգտագործվող մի քանի չափանիշներից ընդամենը մեկն է, ինչի միջոցով որոշվում է տուժածի իրավասությունը օգնության համար: Եթե ձեր զննումից հետո հարցեր ունեք, խնդրում ենք զանգահարել FEMA-ի Օգնության կենտրոն հետևյալ հեռախոսահամարով՝ 800-621-3362:

Եթե տուժածն իրավասու համարվի, FEMA-ն կծանուցի այդ մասին զննումից հետո 7-ից 10 օրվա ընթացքում: Կուղարկվի FEMA-ի որոշման նամակ, որտեղ կնշվեն իրավասու օգնության մանրամասները: Թարմացված տեղեկությունները և ծանուցումներն ավելի արագ ստանալու համար տուժածները կարող են առցանց հաշիվ ստեղծել DisasterAssistance.gov կայքում՝ FEMA-ի օգնության համար դիմելուց հետո:

FEMA-ն հաստատված դրամական միջոցներն ուղարկում է ուղիղ դեպոզիտի միջոցով՝ դիմումի գործընթացում տրամադրված չեկային կամ խնայողական հաշվին կամ չեք կուղարկի փոստով: Տուժածները պետք է գումարն օգտագործեն նախատեսված նպատակի համար, ինչպես բացատրված է նամակում, և պահպանեն գրառումները և անդորրագրերն առնվազն երեք տարի, որպեսզի ցույց տան, թե ինչպես են օգտագործվել դրամական միջոցները աղետից վերականգնման համար: Օգնության մի քանի կատեգորիա կա, և հնարավոր է, որ մեկից ավելի պահանջների համապատասխանեք։

Եթե տուժածի օգնությունը չի հաստատվում կոնկրետ կետերի համար, դա չի նշանակում, որ այդ կետերը բաց են թողնվել զննումից: Եթե տուժածը կարող է ցույց տալ FEMA-ին, որ աղետի հետևանքով տեղի է ունեցել վնաս, որը գերազանցում է իրենց զննման ընթացքում արձանագրված վնասը, ապա կարող է իրականացնել FEMA-ի որոշումը բողոքարկելու գործընթաց: FEMA-ի որոշումը բողոքարկելու գործընթացը նկարագրված է FEMA-ի կողմից տրամադրված որոշման նամակում:

Բողոքարկման գործընթացի մասին լրացուցիչ տեղեկությունների համար այցելեք Ինչպե՞ս կարող եմ բողոքարկել վերջնական որոշումը: էջ: