HONOLULU – ʻOku toe ʻa e uike ʻe taha - ʻo ngata ki he Pulelulu, ʻOkatopa 25 – ke fakahū atu ai ha Kole ki he Tokoni Fakapuleʻanga meí he FEMA ʻa e ngaahi kautaha ʻikai fakatupu paʻangá, kau ki ai ʻa e ngaahi fale faiʻanga lotu, kuo hoko kia kinautolu ha ngaahi mole ko e tupu meí he ngaahi vela vao mo e ngaahi matangi mālohi ʻi Mauí.
ʻOku ʻikai ko e maumau fisikalé pē ʻoku fakapaʻanga ʻe he polokalama Tokoni Fakapuleʻanga ʻa e FEMA. ʻE lava ke fakahū atu foki ʻe he ngaahi kautaha ʻikai fakatupu paʻanga ʻi Maui mo e ngaahi vahefonua ʻo Hawaiʻi ke totongi fakafoki ʻa e Kole ki he Tokoni Fakapuleʻangá ki he ngaahi fakamole totonu ʻoku fekauʻaki mo hono maluʻi ʻo e ngaahi ngāue lalahí.
ʻOku ʻoatu ʻe he polokalama Tokoni Fakapuleʻangá ʻa e ngaahi paʻanga ki he ngaahi kautaha ʻa e puleʻangá kae pehē ki he ngaahi kautaha ʻikai fakatupu paʻanga taautaha ki hono toʻo ʻo e vevé, ngaahi ngāue maluʻi fakavavevavé mo e ngaahi ngāue lalahi ʻi he koló kuo maumau pe fakaʻauha ʻe he ngaahi vela vao mo e matangi mālohi ʻo ʻAokosi 8.
Ki he ngaahi kautaha ʻikai fakatupu paʻangá, kau ki ai ʻa e ngaahi fale faiʻanga lotú, ʻoku tuʻunga ʻa e tohi kolé pe ʻoku fakakulupu ʻa e kautaha ʻikai fakatupu paʻanga taautaha ko iá ki hono fakahoko ʻo e ngaahi ngāue vivili pe ngaahi ngāue sōsiale ʻikai vivili, kae mahuʻinga.
ʻE lava ʻo kole fakahangatonu ʻa e ngaahi kautaha ‘ikai fakatupu paʻanga taautaha ʻokú nau fakahoko ʻa e ngaahi ngāue vivilí, ki ha tokoni fakapaʻanga meí he FEMA ʻo hangē ko e ngaahi fale mo e naunau ki hono tokangaekina ʻo e moʻuí. Kuo pau ke ʻuluaki kole ʻa e niʻihi ʻo e ngaahi kautaha ‘ikai fakatupu paʻanga taautahá, kau ki ai ʻa e ngaahi fale faiʻanga lotú, ʻa ia ʻoku fakakulupu ki hono fakahoko ʻo e ngaahi ngāue sōsiale ʻikai vivili, kae mahuʻingá ki ha nō ki he fakatamakí ʻa ia ʻoku siʻisiʻi hono totongi fakafokí meí he Pule Pisinisi Iiki ʻa ʻAmeliká.
ʻE ʻikai fakatatali ʻa e ngaahi kautaha ʻikai fakatupu paʻangá ki ha tuʻutuʻuni meí he SBA kae lava ke kole ki he FEMA.
ʻOku poupouʻi ʻa e ngaahi fale faiʻanga lotú mo e ngaahi kautaha ʻikai fakatupu paʻanga kehé ke fakahū ha Kole ki he Tokoni Fakapuleʻangá ʻa ia ʻoku fakamalumalu ʻi he polokalama tokoni ʻa e Tokoni Fakapuleʻanga ʻa e FEMA. Ko e ʻaho fakaʻosí ko e Pulelulu, ʻOkatopa 25. Ke maʻu ha fakamatala lahi ange, fetuʻutaki ki he Taki ʻo e Tokoni Fakapuleʻangá Brian Fisher ʻo e Kautaha ki hono Puleʻi ʻo e Meʻa Fakafokifā ʻa Hawaiʻi ʻi heBrian.J.Fisher@hawaii.gov. Té ke lava foki ʻo telefoni ki ai ʻi he 808-518-7985.
Kapau ʻe ʻikai tali ha fale faiʻanga lotu pe ha kautaha ʻikai fakatupu paʻanga kehe ʻa ia ʻokú ne fakahahoko ha ngaahi ngāue ʻikai vivili, kae mahuʻinga ki ha nō SBA, pe kapau ʻoku ʻikai lava ʻe he lahi ʻo e noó ʻo fua ʻa e fakamole ʻo e kotoa ʻo e ngaahi monomonó, ʻe ala lava ke tokoni ʻa e FEMA. ʻE lava ke ʻoatu ʻe he FEMA ʻa e paʻangá ke totongi ʻa ia naʻe ʻikai totongi ʻe he SBA pe maluʻí.
Ko e ngaahi fakatātā ʻo e ngaahi ngāue vivilí ʻoku kau ki ai ʻa e vaí, ngaahi sisitemi suá mo e fakaʻuhilá; ngaahi ako tāutaha ʻokú nau fakahoko ʻa e ako lautohí mo e kolisí; pe ngaahi ako maʻōlunga angé. Ngaahi fakatātā ʻo e ngāue ʻikai vivili kae mahuʻingá ʻoku kau ki ai ʻa e ngaahi ngāue ki hono fakaivia ʻo e akó, ngaahi ngāue tokangaekina mo e tokangaekina ʻaho ʻo e fānaú, ngāue fakaʻapi maʻá e kakai ʻoku ʻi ai honau ngaahi faingataʻaʻiá, ngāue tokoni ki he nofoʻanga maʻá e kau maʻu vāhenga maʻulaló, ngaahi nofoʻanga maʻá e kakai ʻikai ha ʻapí mo e ngāue fakafokifokí, mo e komiunitií mo e ngaahi senitā ki he hivá mo e faivá.
Ki he fakamatala fakamuimu taha fekauʻaki mo e ngaahi ngāue fakaakeake meí he vela vao ʻi Mauí, vakai ki he mauicounty.gov, mauirecovers.org,fema.gov/disaster/4724 mo e https://www.sba.gov/hawaii-wildfires. Muimuiʻi ʻa e FEMA ʻi he mītia sōsialé: @FEMARegion9 mo e facebook.com/fema.