HONOLULU – Adda idiay Maui dagiti espesialista ti FEMA’s Disaster Survivor Assistance, a tumultulong kadagiti residente a naapektaran kadagiti makadadael nga uram iti kabakiran a mangtaming kadagiti madagdagus a kasapulan ken mangiturong kadakuada kadagiti dadduma a kita ti tulong manipud kadagiti programa ti county, state, federal ken nonprofit.
Dagitoy a grupo ket paset ti damo a dalluyon dagiti nagresponde a simmangpet iti isla ket dagus a nangrugida a nakipagkita kadagiti nakalasat. Ginasut a tattao ti nangikonektar dagiti espesialista kadagiti mamalbalakad iti krisis, serbisio ti beterano, American Red Cross ken dadduma pay a Boluntario nga Organisasion nga Aktibo iti Kalamidad. Agingga ita, nasurok nga 430 a pagtaengan ti simmarungkar dagiti grupo ken nakatulongda iti nasurok a 1,450 a nakalasat nga agaplay iti pederal a tulong.
Tapno maipaay dagiti kasapulan dagiti nakalasat, mapan dagiti grupo kadagiti sangakaarrubaan, a sumarungkar kadagiti temporario a lugar a pagnaedan ken ipaayda ti bagbagida a mangsungbat kadagiti saludsod kadagiti Disaster Recovery Centers. Inaldaw a silulukat dagiti sentro manipud alas 8 t.b. agingga alas 7 t.m. iti Unibersidad ti Hawaiʻi Maui College, 310 W. Ka’ahumanu Ave., Kahului, ken ni Mayor Hannibal Tavares a Sentro ti Komunidad, 91 Pukalani St., Makawao.
Dagiti Disaster Recovery Centers ket mabalin a mastrek dagiti tattao nga addaan iti depekto ken dagidiay addaan iti access ken functional needs. Mangitukonda kadagiti serbisio ti komunikasion agraman ti katulongan a teknolohia para kadagiti tattao nga agkasapulan iti pagdagusan iti panagkita wenno panagdengngeg, American Sign Language wenno kinalaing iti dadduma a pagsasao.
Dagiti grupo ti Disaster Survivor Assistance ikabilda ti pannakipagrikna ken panagraem iti sango ti tunggal pannakilangen, ken nakasaganada a tumulong kadagiti umili nga agaplikar iti tulong, uray kadagiti karirigatan a kasasaad.
Para iti kaudian nga impormasion maipapan kadagiti panagregget a mangpaimbag iti uram iti kabakiran ti Maui, bisitaen ti mauicounty.gov ken fema.gov/disaster/4724. Suroten ni @FEMARegion9 iti Twitter ken iti facebook.com/fema.