FEMA Kev Pab Rau Tib Neeg pab cov neeg dim kev puas tsuaj kom pib rov zoo dhau ntawm kev pub nyiaj rau tej uas lawv toob kas. FEMA kev pab no tsis yog theej lub koom haum tuav pov hwm, thiab kuj qog tsis tau lwm yam kev pab uas koj twb txais.
Kuv Yuav Ua Li Cas Thiaj Tso Npe Rau FEMA Kev Pab?
- Mus saib DisasterAssistance.gov,
- Muab qhov FEMA App txuas rau koj lub xov tooj ntawm tes.
- Mus xyuas Ib Qho Chaw Rov Zoo Ntawm Kev Puas Tsuaj. Koj nrhiav tau ib qho chaw uas qhib rau ntawm fema.gov/drc,
- Hu mus dawb rau 800-621-3362. Tus xov tooj no qhib txhua hnub thaum 6 moo sawv ntxov mus rau 10 moo tsaus ntuj, thiab muaj kev pab hauv ntau yam lus. Yog koj siv lub cuab yeej pab tham xov tooj xws li kaw duab thaum tham (VRS), lub cuab yeej sau ntawv thaum hais lus los yog lwm yam cuab yeej, ces muab koj tus lej rau kev pab cuam ntawd pub rau FEMA.
FEMA muab tau kev pab zoo li cas?
- Kev Pab Rau Tej Uas Toob Kas Heev kom thiaj cawm txoj sia los yog txhawb txoj sia, suav nrog dej, zaub mov, kev kho mob, tshuaj kho mob, hmoov kua mis rau mos ab, cov khoom pub mis noj, cov daiv pawm, cov khoom kho mob uas noj tau, cov khoom siv kho mob, khoom tu tus kheej thiab roj rau tsheb thauj mus los.
- Kev Pab Nrhiav Chaw Nyob rau cov uas toob kas ib qho chaw nyob tam sim no vim lawv nyob tsis taus rau hauv lawv lub tsev vim raug cua daj cua dub.
- Kev Pab Them Nqi Xauj Tsev rau cov nqi tsev so, nov yog rau cov neeg uas tsis muaj kev tuav pov hwm los yog muaj kev tuav pov hwm tsis txaus uas rov mus nyob hauv lawv lub tsev tsis tau vim raug puas tsuaj ntawm cov cua daj cua dub. Ceev cia cov ntawv ua pov thawj txog tus nqi them.
- Kev Pab Kho Tsev/Kev Pab Nrhiav Tsev Tshiab rau tej qho puas tsuaj uas lwm lub koom haum tseem tsis tau pab txog.
- Kev Pab Xauj Tsev rau lwm lub tsev nyob yog koj nyob tsis taus rau hauv koj lub tsev vim raug puas tsuaj ntawm cov cua daj cua dub.
- Kev Pab Rau Yus Li Teej Tug kom pab kho los yog theej tej teej tug tseem ceeb uas raug ntawm cov cua daj cua dub thiab lub koom haum tuav pov hwm yuav tsis pab pov hwm.
- Kev Pab Thauj Mus Los rau cov tsheb uas raug puas tsuaj ntawm cov cua daj cua dub.
- Kev Pab Kho Mob thiab Kho Hniav rau tej yam toob kas ntawm sab kev kho mob thiab sab kev kho hniav rau cov tib neeg uas tau raug cov cua caj cua dub uas tsis muaj kev tuav pov hwm rau tej ntawd
- Kev Pab Them Rau Lub Ntees Tuag rau cov tib neeg uas tau tas sim neej ntawm cov cua daj cua dub no.
Yog vim li cas thiaj raug “xyeej” tsis tsim nyog txais kev pab?
Tej thaum seem tshuav ntaub ntawv es yuav tsum xa ntaub ntawv tuaj ntxiv kom FEMA thiaj txiav txim siab seb puas tsim nyog txais kev pab.
Ib co piv txwv txog cov ntaub ntawv uas seem tshuav muaj xws li:
- Ntawv pov thawj tias muaj kev tuav pov hwm
- Ntawv daws kev thov nyiaj ntawm lub koom haum tuav pov hwm los yog tsab ntawv raug xyeej tsis kam pub nyiaj ntawm lub koom haum tuav pov hwm
- Ntawv pov thawj txog koj yog leej twg
- Ntawv pov thawj tias koj nyob ntawm qhov chaw ntawd
- Ntawv pov thawj tias koj yog tus tswv rau lub tsev/qhov chaw ntawd
- Ntawv pov thawj qhia tias lub tsev/qhov chaw uas tau raug puas tsuaj twb yog tus neeg tso npe lub tsev/qhov chaw nyob thaum raug ntawd.
Yog muaj lus nug txog koj tsab ntawv raug xyeej ntawm FEMA ces yuav tau hu mus rau tus xov tooj pab rov zoo ntawm kev puas tsuaj rau ntawm 800-621-3362. Koj kuj mus xyuas tau Qhov Chaw Rov Zoo Ntawm Kev Puas Tsuaj (DRC) uas ze tshaj. Kom kawm ntxiv txog cov chaw DRC thiab DRC cov teev ua hauj lwm no, koj mus saib tau fema.gov/drc. Tshawb nrhiav raws li lub xeev thiab xaiv Arkansas.
FEMA tus kws kuaj tsev kuaj rau qhov twg?
Tej zaum yuav tsum muaj FEMA ib qho kev kuaj tsev kom txiav txim siab seb lub tsev puas txaus nyob, puas yooj yim nkag thiab puas tseem khiav li yuav tau khiav. Cov kws kuaj tsev tsis txiav txim siab seb tus neeg nyob ntawd puas tsim nyog txais kev pab. FEMA yuav txiav txim siab seb ib tug neeg twg tsim nyog txais kev pab raws li tej yam nram qab no:
- Lub tsev sab nraud puas ruaj puas khov, suav nrog cov qhov rooj, lub ruv tsev, thiab cov qhov rais?
- Fai fab, roj, cua sov, cov kav dej qias neeg, thiab chaw khaws dej qias neeg puas tseem ua hauj lwm zoo?
- Lub tsev sab hauv puas tseem txaus nyob thiab ruaj khov, suav nrog lub qab nthab thiab plab tsev?
- Lub tsev puas tseem muaj peev xwm tiv thaiv neeg ntawm huab cua sab nraud?
- Puas muaj kev nkag tsev yooj yim thiab kev tawm tsev mus?
Thov nco ntsoov: Txawm yog ib lub tsev raug puas tsuaj los, tej thaum lub tsev ntawd tseem nyab xeeb txaus rau cov neeg nyob rau haud.
Ua li cas kuv tus neeg zej zog tau txais nyiaj ntau dua kuv kom thiaj kho tsev?
Nyias tus neeg yuav txais nyias qhov nyiaj. Muaj ntau yam uas peb saib thaum txiav txim siab seb ib tug neeg twg yuav txais nyiaj ntau npaum li cas, suav nrog lub koom haum tuav pov hwm kev pab thiab seb tau raug puas tsuaj ntau npaum li cas.
Kuv rov txua dua ib lub tsev tshiab tsis tau nrog cov nyiaj uas FEMA muab pub rau kuv.
FEMA kev pab twb tsis yog nyiaj tuav pov hwm. FEMA kev pab yog rau tej dej num kho tsev kom thiaj txaus nyob thiab nyab xeeb. Piv xam li, tej zaum FEMA yuav muab nyiaj rau koj kom theej los yog kho tej qho hauv koj lub tsev xws li cov rooj tso quav, fai fab, roj, dej, cov qhov rais, cov qhov rooj, thiab ib lub ruv tsev, tiam sis yuav tsis pub nyiaj theej cov ntaub thaiv qhov rais los yog cov duab zoo nkauj ntawm phab ntsa.e, curtains or artwork.
Kuv xauj tsev nyob. Kuv puas tsim nyog txais FEMA kev pab?
Cov neeg xauj tsev uas raug puas tsuaj ntawm cov cua daj cua dub thiab dej los nyab los tej zaum yuav tsim nyog tso npe rau tseem fwv kev pab. FEMA cov nyiaj pab no pab them tau rau ib lub tsev nyob tau ib ntus. Cov neeg xauj tsev tej zaum kuj yuav tsim nyog txais nyiaj pab theej los kho lawv cov teej tug xws li rooj tog, khoom siv, khaub ncaws, cov ntawv kawm ntawv los yog khoom siv rau lub tsev kawm ntawv; theej los yog kho cov cuab yeej thiab lwm yam khoom siv uas yuav tsum siv rau yus li txoj hauj lwm; cov tsheb tsav; cov nqi rau kev kho mob, kev kho hniav, kev zov me nyuam, thiab cov nqi tsiv tsev thiab chaw ntim khoom uas lub koom haum tuav pov hwm tsis pab them rau.
Yog tias kuv tsis yog ib tug peej xeem Amelikas, kuv tsev neeg tseem tso npe puas tau rau FEMA kev pab?
Kom thiaj tsim nyog txais FEMA kev pab, koj los yog ib tug hauv koj tsev neeg yuav tsum yog ib tug pej xeem Amelikas, neeg Amelikas hauv ib qho chaw uas tsis yog ib lub xeev, los yog ib tug tsim nyog uas tsis yog pej xeem. Txawm yog tej no, cov tsev neeg uas nyias tus neeg hauv tsev neeg muaj nyias theem pej xeem mas, tsuas laib muaj ib tug xwb (suav nrog cov me nyuam) uas yog pej xeem Amelikas, neeg Amelikas, los yog neeg tsim nyog uas tsis yog pej xeem thiab muaj ib tug lej Xaus Saum kom thiaj tso npe. Ib tug neeg tsim nyog uas tsis yog pej xeem yog li:
- Neeg nyob no raws cai (muaj “daim npav ntsuab”)
- Ib tug neeg khiav tawg rog, neeg thoj nam, los yog neeg tsiv teb chaw uas qhov raug cab rov qab mus rau lawv lub qub teb chaws tseem muab tos
- Neeg tsiv tsev rau Miskas Teb uas muaj tub ceev xwm saib xyuas tau ib xyoos ntau
- Neeg tsiv tsev uas lub teb chaws cia nkag tsuas yog nws coj raws li cov lus qhia uas tau muab rau nws (raws li txoj cai uas pib raug thaum Lub Plaub Hli Tim 1, 1980)
- Neeg Cuba/Neeg Haiti
Ib co neeg tsiv teb chaws uas tau raug tsim txom phem heev xws li raug muab muag ua plees ua yi, suav nrog cov neeg uas muaj tus “T” los yog tus “U” rau ntawm daim ntawv tsiv teb chaws.
Cov neeg laus uas tsis tsim nyog tso npe raws li cov lus saum toj no, lawv tseem tso npe tau rau ib tug me nyuam uas tsim nyog thiab muaj ib tug lej Xaus Saum. Ib tug me nyuam yuav tsum nyob nrog tus niam txiv los yog neeg saib xyuas uas tso npe rau nws. Tus niam txiv los yog neeg saib xyuas lawv tsis tas faib ntaub ntawv txog lawv li theem tsiv teb chaws los yog sau npe rau cov ntawv txog lawv theem tsiv teb chaws.
Yuav ua li cas yog kuv tsis pom zoo rau FEMA kev txiav txim siab?
Txhua tus neeg tso npe muaj cai thov FEMA rov qab txiav txim siab dua. Piv xam li, yog koj xav tias koj txais kev pab tsis yog los yog tsis txaus, ces koj xa tau ntawv qhia kev tsis txaus siab thov FEMA rov qab txiav txim siab dua.
Yuav ua li cas xa ntawv thov rov qab txiav txim siab dua?
Tus txheej txheem thov rov qab txiav txim siab dua los yooj yim lawm. Tsis tas xa Tsab Ntawv Thov Rov Qab Txiav Txim Siab Dua yog tias tus neeg tso npe xa ntawv ua pov thawj yog vim li cas nws xav kom FEMA rov qab txiav txim siab dua. Yog koj xav ces koj xa tau Daim Foos Thov Rov Qab Txiav Txim Siab Dua los yog Tsab Ntawv Thov Rov Qab Txiav Txim Siab Dua, tiam sis koj tsis tas ua li ntawd.
Koj yuav tsum xa moo qhia kev tsis txaus siab thov FEMA rov qab txiav txim siab dua ua ntej dhau 60 hnub txij thaum koj txais tsab ntawv txiav txim siab lawm. Yog koj tsis muaj tag nrho cov ntaub ntawv uas yuav tsum muaj ua ntej dhau 60 hnub, ces koj tseem yuav tsum xa daim ntawv qhia kev tsis txaus siab thov rov qab txiav txim siab dua ua ntej dhau 60 hnub ntawd. Koj yuav muaj cib fim xa cov ntawv ua pov thawj uas seem tshuav yav tom ntej.
Koj yuav tau xa cov qauv ntawv txhawb nqa tuaj, suav nrog ntawv ua pov thawj txog tej yam uas koj xiam ntawm kev puas tsuaj. Tag nrho cov ntawv, cov ntawv ua pov thawj, cov ntawv tsub nqi, cov ntawv suav nyiaj, cov ntawv lav lus, cov ntawv tswj hwm, cov ntawv tuav pov hwm, thiab cov ntawv kab tus nqi yuav tsum muaj cov ntaub ntawv tiv tauj rau tus neeg xa cov ntawv ntawd tuaj. Yog koj yuav tsum xa ntaub ntawv ntxiv tuaj, ces koj xa tau ib Daim Thov Rov Qab Txiav Txim Siab Dua Rau Tib Neeg Thiab Tsev Neeg los yog ib tsab ntawv thov rov qab txiav txim siab dua.
Ua tib zoo sau koj lub npe, tus lej puas tsuaj thiab FEMA tus lej tso npe rau tag nrho koj cov ntaub ntawv uas koj xa mus rau FEMA. Cov lej no nyob rau ntawm koj tsab ntawv txiav txim siab saum koj lub npe thiab qhov chaw nyob. Khaws cia tag nrho cov ntawv tseeb rau koj tus kheej thiab xa cov qauv ntawv mus rau FEMA xwb.
Kom pub cai rau lwm tus neeg los yog lwm lub koom haum sawv koj cev, yuav tsum xa Daim Pub Cai Tso Ntaub Ntawv Tawm nrog rau koj tsab ntawv txiav txim siab. Kom thiaj kawm ntxiv, tiv tauj mus rau FEMA Tus Xov Tooj Pab rau ntawm 1-800-621-3362.
Koj mus xyuas tau Qhov Chaw Rov Zoo Ntawm Kev Puas Tsuaj twg los tau rau hauv koj lub xeev, los yog:
- Muab ntxiv rau koj lub as khauj nyob ntawm DisasterAssistance.gov. Nias rau “Check Status” nyob ntawm thawj nplooj thiab ua raws li cov lus qhia ntawd.
- Xa ntawv fej mus rau: 1-800-827-8112 Attn: FEMA
- Xa ntawv mus rau: FEMA P.O. Box 10055 Hyattsville, MD 20782-8055
Koj yuav txais ib tsab ntawv txiav txim siab ntawm FEMA ua ntej dhau 90 hnub txij thaum FEMA txais koj daim thov rov qab txiav txim siab dua.
Kom saib seb koj qhov thov rov qab txiav txim siab nyob rau theem twg lawm, mus saib www.DisasterAssistance.gov ces nias rau Check Status yog koj twb tsim ib lub as khauj hauv is taw nej, los yog hu mus rau FEMA Tus Xov Tooj Pab.