FEMA im state eo an Arkansas emõj aer kõjejjet kutien Transitional Sheltering Assistance (Jibañ kin Jikin Kiki ilo Kõtaan Ien, TSA) ñan armij in Arkansas ro ekar jako ak jorrāān moko mweir jen an kar lukkun nana mejatoto ilo bukon ko ilo Baxter, Boone, Fulton, Madison im Marion.
Armij ro rej jokwe ilo bukon kein emõj aer kanne ablikajon remaron tõbrak in jokwe ilo hotel ak motel ilo kõtaan ien im FEMA ej kollaiki wonnen. Ñan an juon maron tõbrak, armij ro rej jokwe rej aikuj kanne aer ablikajon ñan Jibañ eo an Kajojo Armij jen FEMA mokta jen Okwoj 28. 2024, raan eo āliktata. FEMA enaj kõjellaik ro rej lelok ablikajon kin aer maron tõbrak ñan jibañ eo an TSA kin kall eo emõj kanne ainikien rikenono ilo talebon, majej ilo text im/ak email, ekkar ñan wāween bõk melele eo rar kelet ilo ien ear kar lelok ablikajon eo ñan jibañ kin jorrāān.
Armij ro rej kanne ablikajon remaron tõbrak elañe rejab maron rool im jokwe ilo mweo mweir ekar jorrāān jen mejatoto im aikuj ko ikijen jikin aer jokwe ejab tõbrak jen injuran, jikin kiki ko an kõtaan ien ak jibañ ikijen reen eo FEMA ak bar juon opij ear lelok.
Iomwin burokraam eo an TSA, FEMA ej kolla wonnen ruum, eowoj im wonnen menninmour ko rejab maron rool ñan hotel im motel ko rej bõk kwõnaer ilo burokraam in. Wonnen menninmour ko renaj kolla wõt ñan joñan jemlok in jibañ eo emõj kõtõbrak ñan kajojo ruum. Armij ro rekkar ioone jorrāān kein ej aer eddo in kolla wonnen ko jet, ekoba wonnen kwalkwol nuknuk, mõñā ilo restaurant/rej boklok ñan ruum, paak wa, talebon, ak reen pija in alwoj.
Rej lale wāween an kajojo armij maron woñmaanlok in tõbrak . Ilo ien ebõjrak an juon maron tõbrak, armij ro rekkar ioon jorrāān renaj loe kõjella eo jen FEMA jilimjuon raan mokta jen raan eo rej aikuj diwõjlok.
Ewõr joñan jemlok an TSA ñan hotel im motel ko rej bõk kwõnaer ilo bukon ko ilo Baxter, Boone, Fulton, Madison im Marion ak bukon ko rej bed iturier. Mennin ekoba hotel ko rej bõk kwõnaer ilo burokraam in ilo bukon ko iloan aelon eo ilo State eo an Arkansas im ekoba bukon ko an Benton, Carroll, Crawford, Franklin, Izard, Johnson, Newton, Searcy, Sharp, Stone im Washington, im State eo an Missouri ekoba bukon ko an Howell, Oregon, Ozark, Stone im Taney. Armij ro rej kanne ablikajon rej aikuj lale Kein Kabõk Jikin TSA ñan lale ebed ia juon hotel ilo www.femaemergencyhotels.com im kadeloñ nomba eo aer ibben FEMA, im rekkar bõke ilo ien aer kar kadeloñ ettaer ñan jibañ eo an FEMA.
Ro rej bõk kwõnaer ilo TSA remaron bar tõbrak ñan jibañ in jāān ko jet an FEMA, ekoba Jibañ ikijen an Jako ak Jorrāān Imõn Jokwe, Jibañ ikijen Reen, Jibañ ñan Kõmmane Jorrāān ko ilo Imõn Jokwe ak wāween ko jet an burokraam in Jibañ eo an Kajojo Armij.
Ñan kanne ablikajon ñan jibañ eo an FEMA, armij ro rar wia ak reene moko mweir remaron:
- Etal ñan juon Jikin Jibañ jen Jorrāān in Mejatoto. Bukõt juon jikin eo emaron lewaj jibañ ilo fema.gov/drc.
- Etal online ñan DisasterAssistance.gov.
- Download ae FEMA App an talebon mobile ko.
- Kall ae lain in jibañ eo an FEMA ilo 800-621-3362 kõtaan 6 awa jibbon im 11 awa boñ. Ewõr jibañ ilo elõñ kain kajin ko roktak. Ñe kwõj aikuj juon kein jibañ in bõk melele, einwõt kein bõk melele ilo bideo (VRS), jeje ko ilo talebon ak bar juon kain jibañ, lelok nomba in kein jibañ eo ñan FEMA.