FEMA thiab lub xeev Arkansas tau pib Kev Pab Nyiaj Rau Nqi Tsev Nyob (TSA) rau cov neeg Arkansas uas raug ntawm cov cua daj cua dub nyob rau hauv cov cheeb tsam Baxter, Boone, Fulton, Madison thiab Marion yam uas lawv nyob tsis taus rau hauv lawv lub qub tsev lawm.
Cov neeg uas nyob rau hauv cov cheeb tsam no uas tau tso npe rau kev pab rov zoo ntawm kev puas tsuaj los tej zaum lawv yuav tsim nyog kom thiaj nyob rau hauv ib lub tsev so uas FEMA yuav them tus nqi rau. Kom thiaj tsim nyog txais kev pab no, cov neeg yuav tsum tso npe rau FEMA Kev Pab Tib Neeg ua ntej dhau Lub Yim Hli Ntuj Tim 28, 2024. FEMA yuav xa moo mus rau cov uas tso npe qhia seb lawv puas tsim nyog txais kev pab TSA no dhau ntawm lub xov tooj thiab/los sis email nyob ntawm seb tus neeg tso npe xaiv txoj kev tiv tauj li cas thaum tso npe rau kev pab rov zoo ntawm kev puas tsuaj.
Tej zaum cov neeg tso npe yuav tsim nyog txais kev pab no yog lawv rov mus nyob tsis taus rau hauv lawv lub qub tsev uas raug kev puas tsuaj thiab lawv lub koom haum tuav pov hwm, lwm qhov chaw nyob rau cov tsis muaj tsev nyob, thiab FEMA kev pab them nqi tsev los yog lwm lub koom haum pab tsis tau hlo li.
Raws li lub khoos kas TSA no, FEMA yuav them tus nqi rau lub hoob pw, cov nqi se thiab cov nqi rau cov tsiaj txhu rau cov tsev so uas koom tes nrog lub khoos kas. Cov nqi rau cov tsiaj txhu mas yuav them txog thaum ncav cuag qhov them tsis tau ntau tshaj rau ib lub hoob. Cov neeg dim yuav tsum duav lwm cov nqi xws li kev ntxhua khaub ncaws, cov zaub mov, chaw nres tsheb, lub xov tooj, thiab nqi xauj zaj nam saib.
Yuav txiav txim siab txog kev tsim nyog thiab qhov kav ntev npaum li cas ib tug neeg dhau ib tug neeg. Thaum kev tsim nyog tag lawm, cov neeg dim yuav txais moo ntawm FEMA xya hnub ua ntej yuav tsum tawm lub tsev so mus.
Lub khoos kas TSA tsuas siv tau cov tsev so rau hauv cov cheeb tsam Baxter, Boone, Fulton, Madison thiab Marion los yog lwm lub cheeb tsam uas npuab cov no. Nov suav nrog cov tsev so nyob rau hauv cov cheeb tsam npuab no nyob rau hauv Lub Xeev Arkansas xws li Benton, Carroll, Crawford, Franklin, Izard, Johnson, Newton, Searcy, Sharp, Stone thiab Washington, thiab nyob rau hauv lub xeev Missouri suav nrog cov cheeb tsam Howell, Oregon, Ozark, Stone thiab Taney counties. Cov neeg tso npe yuav tsum mus saib lub cuab yeej TSA Locator kom nrhiav ib lub tsev so nyob tom www.femaemergencyhotels.com thiab ntaus ntawv lawv tus lej FEMA, uas lawv txais thaum tso npe rau FEMA kev pab.
Cov neeg tso npe rau TSA kev pab no tej zaum yuav tsim nyog txais lwm hom kev pab ntawm FEMA, xws li Kev Pab Nrhiav Tsev Nyob, Kev Pab Them Nqi Tsev Xauj, Kev Pab Kho Tsev thiab lwm yam kev pab ntawm lub khoos kas Pab Tib Neeg.
Yog cov tswv tsev thiab neeg xauj tsev xav tso npe rau FEMA kev pab, ces lawv thiaj ua tau:
- Mus saib ib Qho Chaw Rov Zoo Ntawm Kev Puas Tsuaj. Nrhiav ib qho chaw ntawm no fema.gov/drc.
- Mus saib DisasterAssistance.gov.
- Muab qhov FEMA App txuas rau koj lub xov tooj ntawm tes.
- Hu FEMA tus xov tooj pab rau ntawm 800-621-3362 nruab lub sij hawm 6 moo sawv ntxov thiab 11 moo tsaus ntuj. Muaj kev pab hauv ntau yam lus. Yog koj siv lub cuab yeej pab tham xov tooj xws li lub cuab yeej yees duab thaum tham xov tooj (VRS), lub cuab yeej sau ntawv thaum sib tham los yog lwm yam cuab yeej, muab tus xov tooj rau koj txoj kev pab cuam ntawd pub rau FEMA.