ZILE VYÈJ AMERIKEN YO– 34yèm anivèsè Lwa pou Ameriken ki gen Andikap yo (Americans with Disabilities Act, ADA) ban nou yon opòtinite pou nou reflechi sou yon lwa ki garanti tout moun ki andikape yo gen menm dwa ak privilèj ak tout lòt moun. Anplis sa, Lwa ADA a raple nou enpòtans preparasyon pou katastwòf pou moun ki andikape yo ak fanmi yo pandan Mwa Fyète Andikap nan Zile Vyèj Ameriken yo.
Prezans Ajans Federal Pou Jesyon Ijans (Federal Emergency Management Agency, FEMA) nan Ekspozisyon “Tout Bagay sou ADA” ki te fèt dènyèman nan St. Thomas ak St. Croix mete aksan sou angajman nou pou travay avèk Ajans Jesyon Ijans Teritwa Vyèj Zile (Virgin Islands Territorial Emergency Management Agency, VITEMA) pou enfòme moun ki gen andikap, ki gen bezwen aksè oswa bezwen fonksyonèl, ak granmoun ki aje yo, yon fason pou yo prepare yo pou ijans ak katastwòf.
Kle pou yon preparasyon efikas pou katastwòf, tankou preparasyon twous, fè yon plan, epi rete enfòme, aplike pou nou chak. Sepandan, moun ki gen bezwen espesyal yo ak fanmi yo dwe konsidere sikonstans ak bezwen endividyèl yo pou prepare yo yon fason efikas pou ijans ak katastwòf.
Lòt konsiderasyon yo ta dwe gen ladan yo sa ki vini annaprè yo la:
- Kreye yon rezo sipò epi rete an kontak ak moun ki ka ede w. Konsève yon lis kontak nan yon resipyan ki rezistan ak dlo nan twous ijans ou a. Aprann plis nan www.ready.gov/ht/kit.
- Fè rezo sipò w la konnen ki kote ekipman ijans ou yo ye. Ou ka bay yon moun ki nan rezo sipò ou a yon kle kay ou.
- Planifye pou transpò ki aksesib pou evakye oswa ale nan yon klinik medikal. Travay ak sèvis lokal yo, transpò piblik oswa transpò adapte pou idantifye opsyon transpò aksesib lokal oswa prive yo.
- Si dyaliz fè pati plan sante w, chèche konnen ki kote diferan sant dyaliz yo ye.
- Detèmine kòman pou itilize ekipman medikal yo nan ka ta gen yon pàn kouran.
- Mete etikèt oswa braslè alèt medikal.
- Si ou gen yon pwoblèm kominikasyon, ekri pi bon fason pou kominike avèk ou nan yon ka ijans.
- Planifye kòman pou evakye avèk aparèy asistans oswa kòman pou ranplase ekipman si li pèdi oswa kraze. Ekri enfòmasyon sou modèl epi ekri ki founisè ki te bay yo, tankou Medicaid, Medicare, oswa asirans prive. Ajoute sa a nan resipyan ki rezistan ak dlo ou a ansanm ak lòt dokiman enpòtan ou yo.
Si ou gen yon bèt asistans, asire w ou mete manje, dlo, etikèt idantifikasyon ak ekipman. Li enpòtan tou pou gen lajan likid nan twous ou a nan ka ou bezwen achte ekipman.
Konsèy pou moun ki soud oswa ki mal pou tande yo enkli, genyen:
- Yon radyo meteyo ki gen afichaj tèks ak yon alèt k ap flache, ansanm ak pil rezèv.
- Pil rezèv pou aparèy pou tande.
- Yon lanp yo mete nan tèt pou klere moun w ap kominike avèk yo a.
- Yon plim ak papye nan ka ou bezwen kominike ak yon moun ki pa konnen lang siy.
Konsèy pou moun ki avèg oswa ki pa wè byen yo enkli:
- Make ekipman ijans yo avèk etikèt an Bray oswa ki gen gwo lèt detache. Kenbe yon lis ekipman ijans ou yo sou yon kle USB pòtab (djonp) oswa kreye yon dosye odyo k ap an sekirite epi nan yon fason ki aksesib.
- Konsève yon aparèy kominikasyon an bray, oswa pou moun ki soud ak avèg nan twous ijans ou a.
Konsèy pou moun ki gen andikap mobilite yo enkli:
- Si w ap itilize yon chèz woulan elektrik, prevwa yon chèz woulan manyèl ki lejè ki disponib kòm yon sekou.. Montre rezo sipò ou a kòman pou yo fonksyone ak chèz woulan ou an.
- Konnen gwosè ak pwa chèz woulan ou an ak si li ka pliye pou transpò.
- Konsève yon aparèy mobilite kòm rezèv tankou yon baton oswa yon aparèy ki pou ede w mache, si w ap itilize youn.
Evalye bezwen espesifik ou yo, egzamine sa ou ta ka bezwen pou rekonstitiye twous ijans ou an epi pratike plan ijans ou an anvan pi gwo sezon siklòn nan Atlantik la rive. W ap jwenn plis enfòmasyon sou moun ki andikape yo nan www.ready.gov/ht/disability epi sou granmoun ki aje yo nan www.ready.gov/ht/older-adults.
###
Misyon FEMA se ede moun anvan, pandan, epi aprè katastwòf yo.