တၢ်လၢကဘၣ်မုၢ်လၢ်- တၢ်သမံသမိးဟံၣ်ဃီတၢ်သူၣ်ထီၣ်

ပှၤအိၣ်ဆိးလၢ Blue Earth, Cook, Cottonwood, Faribault, Freeborn, Goodhue, Itasca, Jackson, Lake, Le Sueur, Mower, Nicollet, Nobles, Rice, Rock, St. Louis, Steele, Waseca, ဒီး Watonwan ကီၢ်ရ့ၣ်တဖၣ်လၢ အပာ်ဖျါထီၣ်လၢ အဝဲသ့ၣ်အိၣ်ဆိး မ့တမ့ၢ် ဘၣ်သ့ၣ်သ့ၣ်အိၣ်ဆိးတသ့ ပူၤဖျဲးဒီးတၢ်ဘၣ်ယိၣ်လၢ အဝဲသ့ၣ်အဟံၣ်ပူၤတဖၣ်အဂီၢ် ဘၣ်သ့ၣ်သ့ၣ် FEMA ကဘၣ်မၤတၢ်သမံသမိးတမံၤ လၢအိၣ်ဆိးလီၢ်လၢအဟးဂီၤတဖၣ်န့ၣ်လီၤ.

ပတံထီၣ်တၢ်လၢ FEMA တၢ်မၤစၢၤအဂီၢ်

ဟံၣ်ကစၢ်ဒီးပှၤဒိးလဲဟံၣ်တဖၣ်လၢ Minnesota အပူၤ 19 ကီၢ်ရ့ၣ်လၢတၢ်ပာ်ပနီၣ်အီၤ လၢအိၣ်ဒီးတၢ်ဘၣ်ဒိဘၣ်ထံးလၢ တၢ်တအုၣ်ကီၤအီၤ မ့တမ့ၢ် တၢ်အုၣ်ကီၤစ့တလၢပှဲၤတဖၣ် လၢအကဲထီၣ်လၢလါယူၤ 16 – လါယူၤလံ 4, 2024, ကလံၤမုၢ်ဒီးထံလုၢ်ဘၢနးနးကျံးကျံးတဖၣ်န့ၣ် ဘၣ်တၢ်ဟ့ၣ်ဂံၢ်ဟ့ၣ်ဘါအီၤလၢ ကပတံထီၣ်တၢ်လၢ FEMA တၢ်မၤစၢၤအီၤလၢဆဲးကျိးန့ၢ်တီၤလၢ DisasterAssistance.gov, ခီဖျိ FEMA လီတဲစိအဲး(ပ) မ့တမ့ၢ်ခီဖျိတၢ်ကိးလီတဲစိဆူ 800-621-3362 န့ၣ်လီၤ. နမ့ၢ်စူးကါတၢ်ဆှၢခီတၢ်တိစၢၤမၤစၢၤ ဒ်အမ့ၢ် ဘံၢ်ဒံၢ်အိၣ်တၢ်ဆှၢခီတၢ်တိစၢၤမၤစၢၤ (VRS), ဘံၢ်ဒံၢ်အိၣ်လၢလံာ်ဖျါတၢ်တိစၢၤမၤစၢၤ မ့တမ့ၢ်အဂၤန့ၣ် ဟ့ၣ်လီၤနနီၣ်ဂံၢ်လၢ တၢ်တိစၢၤမၤစၢၤဝဲန့ၣ်အဂီၢ်ဆူ FEMA ဖဲနပတံထီၣ်တၢ်အခါတက့ၢ်.

နမ့ၢ်အိၣ်ဒီးတၢ်အုၣ်ကီၤ လၢအကျၢၢ်ဘၢတၢ်တတၢာ်တနါတၢ်ဟးဂီၤ မ့တမ့ၢ် တၢ်လီၤမၢ်လၢဟံၣ်ဒီးနီၢ်ကစၢ်စုလီၢ်ခီၣ်ခိၣ်န့ၣ် တဘၣ်သးပ့ၤနီၣ်လၢ ကတီၣ်ထီၣ်တၢ်ဃ့လိးက့ၤစ့အဂီၢ်တဂ့ၤ. FEMA ကဃ့တၢ်ပာ်ဂၢၢ်ပာ်ကျၢၤတၢ်အုၣ်ကီၤလံာ်ပရၢ မ့တမ့ၢ် တၢ်န့ၢ်ဘျုးလံာ်တီလံာ်မီ ဒ်သိးတၢ်ကဆိကမိၣ်န့ၢ်အီၤလၢ ကီၢ်စၢဖှိၣ်ပဒိၣ်အတၢ်မၤစၢၤအဂီၢ်န့ၣ်လီၤ.

တၢ်သမံသမိးကွၢ်ဟံၣ်

ဖဲတၢ်ပတံထီၣ်တၢ်မၤစၢၤအသီတဆံအတီၢ်ပူၤန့ၣ် ဘၣ်သ့ၣ်သ့ၣ် ပှၤသမံသမိးတၢ်တဂၤ ကကိးနၤလၢလီတဲစိ ဒ်သိးကရဲၣ်ကျဲၤတၢ်သ့ၣ်နံၤဖးသီလၢ တၢ်လီၢ်တၢ်ကျဲလၢ တၢ်ပာ်ဖျါထီၣ်တၢ်ဟးဂီၤန့ၣ်လီၤ. ပှၤသမံသမိးတၢ်အတၢ်ကိးလီတဲစိန့ၣ် ဘၣ်သ့ၣ်သ့ၣ်ကဟဲလၢ ကီၢ်စဲၣ်အချၢမ့တမ့ၢ် လီတဲစိနီၣ်ဂံၢ်လၢ “နတသ့ၣ်ညါ” ဒီးအဝဲသ့ၣ်ကမၢနတဲကျၢၤ တၢ်ဂ့ၢ်တၢ်ကျိၤလၢအပာ်ဖျါနတၢ်မ့ၢ်တၢ် ခီဖျိလီတဲစိန့ၣ်လီၤ.

FEMA အပှၤသမံသမိးတၢ်တဖၣ် ကိးလီတဲစိအဘျီဘျီ ဒ်သိးကဆဲးကျိးနၤ ခီဖျိလီတဲစိ, လီတဲစိလံာ်ပရၢဖုၣ် မ့တမ့ၢ် အံမ့(လ) ဒ်သိးကရဲၣ်ကျဲၤတၢ်သ့ၣ်နံၤဖးသီတဘျီအဂီၢ်န့ၣ်လီၤ. FEMA ဆဲးကျိးနၤမ့ၢ်တသ့န့ၣ် တၢ်ကဆှၢနၤလံာ်ပရၢတဘ့ၣ် လၢအဒုးနဲၣ်လၢ နတၢ်ပတံထီၣ်န့ၣ် တၢ်သုးကျဲၤအီၤဆူညါတသ့ဘၣ်အဂ့ၢ်, ဒီးကမၤအီၤဆူညါအဂီၢ် နကဘၣ်ကိး FEMA အတၢ်မၤစၢၤလီတဲစိကျိၤလၢ 800-621-3362 ဒ်သိးကတဲလီၤတံၢ် နတၢ်ဆဲးကျိးတၢ်ဂ့ၢ်တဖၣ် ဒီးတၢ်လိၣ်ဘၣ်တၢ်မၤစၢၤအဂီၢ်န့ၣ်လီၤ.

ဖဲ FEMA အပှၤသမံသမိးတၢ်ကိးနၤလဲလီတဲစိအခါ, ကွဲးလီၤ-

• ပှၤသမံသမိးတၢ်အမံၤ
• တၢ်ကိးလီတဲစိအမုၢ်နံၤ
• တၢ်သ့ၣ်နံၤဖးသီ အမုၢ်နံၤဒီးတၢ်ဆၢကတီၢ်
• ပှၤသမံသမိးတၢ် အလီတဲစိနီၣ်ဂံၢ်

ပှၤသမံသမိးတၢ်မ့ၢ်ဆဲးကျိးနၤ ဘၣ်ဆၣ်ပှၤလၢအပတံထီၣ် FEMA တၢ်မၤစၢၤလၢဟံၣ် မ့ၢ်တအိၣ်နီတဂၤဘၣ်န့ၣ် ဃ့ထုးကွံာ်တၢ်ပတံထီၣ် ဒီးဘိးဘၣ်သ့ၣ်ညါ FEMA ခီဖျိတၢ်ကိးလီတဲစိဆူ 800-621-3362 တက့ၢ်.

ဖဲတၢ်သမံသမိးတၢ်အတီၢ်ပူၤ

တၢ်သမံသမိးတၢ်ညီနုၢ်တဘျီန့ၣ် ယံာ်ဝဲ 45 မံးနံးလၢကဝံၤအဂီၢ်န့ၣ်လီၤ. ပှၤသမံသမိးတၢ်တဖၣ် တဆၢတဲာ်တၢ်ဖျိးစိကြၢးဘၣ်လၢ FEMA တၢ်မၤစၢၤအဂီၢ်ဘၣ်. အဝဲသ့ၣ်ကွၢ်တၢ် ဒ်သိးကပာ်ဂၢၢ်ပာ်ကျၢၤ တၢ်ဟးဂူၤဟးဂီၤလၢ တၢ်ပာ်ဖျါဃာ်လၢနလံာ်ပတံအပူၤန့ၣ်လီၤ. နၤ မ့တမ့ၢ် ပှၤပတံထီၣ်တၢ်သကိးဒီးနၤလၢ နဟ့ၣ်မူဒါန့ၣ် ကဘၣ်ထံၣ်လိာ်သးဒီးပှၤသမံသမိးတၢ် ဒီးဟ့ၣ်တၢ်ဂီၤ ID တခါန့ၣ်လီၤ. နကွဲမုာ်ပှၤအဂၤတဂၤ ဒ်အမ့ၢ်ဟံၣ်ဖိဃီဖိ, ဘူးတံၢ် မ့တမ့ၢ်တံၤသကိးတဂၤ ဒ်သိးကကတိၤသကိးစၢၤတၢ် ဃုာ်ဒီးပှၤသမံသမိးတၢ်အဂီၢ်သ့န့ၣ်လီၤ.

• နၤ မ့တမ့ၢ် နပှၤပတံထီၣ်သကိးတၢ် မ့ၢ်ထံၣ်လိာ်သးဒီးပှၤသမံသမိးတၢ်တသ့ဘၣ်န့ၣ် တၢ်ဟ့ၣ်မူဟ့ၣ်ဒါပှၤသၢဖုတဖုသ့ လၢတၢ်ကွဲးဒီးဟ့ၣ်စိဟ့ၣ်ကမီၤအီၤ တချုးတၢ်ဆၢကတီၢ်ဒီးမုၢ်နံၤလၢ တၢ်ရဲၣ်ကျဲၤဃာ်န့ၣ်လီၤ.
• FEMA အပှၤသမံသမိးတၢ်တဂၤန့ၣ် စိာ်ဝဲ ID လၢအဖိးသဲစးဒီး တဃ့စ့တၢးတၢ်ဂ့ၢ်တၢ်ကျိၤ မ့တမ့ၢ် ဃ့အဘူးအလဲလၢ တၢ်သမံသမိးတၢ်အဂီၢ် နီတဘျီဘၣ်. နမ့ၢ်သးဒ့ဒီလၢ ပှၤသမံသမိးတၢ်အံၤ တမ့ၢ်ပှၤလၢအစံးလၢအဝဲသ့ၣ်မ့ၢ်ဝဲန့ၣ် တဲအီၤလၢကဟးထီၣ်တဘျီဃီအဂီၢ် ဒီးဆဲးကျိးလီၢ်ကဝီၤပူၤပၢၤကီၢ်န့ၣ်တက့ၢ်.
• ပှၤသမံသမိးတၢ်န့ၣ် ကပာ်ဂၢၢ်ပာ်ကျၢၤ ပှၤပတံထီၣ်တၢ်အမံၤ, အိၣ်ဆိးလီၢ်, တၢ်ဆဲးကျိးတၢ်ဂ့ၢ်, တၢ်အုၣ်ကီၤကျၢၢ်ဘၢ ဒီးတၢ်ကဲဟံၣ်ကစၢ်တၢ်အိၣ်သးန့ၣ်လီၤ.
• ပှၤသမံသမိးတၢ်န့ၣ် ကဟးဝဲလၢဟံၣ်ပူၤ ဒ်သိးကခံကွၢ်စီၤကွၢ်တၢ်လီၢ်တဖၣ် လၢအဟးဂီၤဒီးတဟးဂီၤတဖၣ် ဒီးကွဲးနီၣ်တၢ်သူၣ်ထီၣ်အတၢ်ဟးဂီၤဒီး မၤဝံၤမၤပှဲၤတၢ်ကွဲးနီၣ် နီၢ်ကစၢ်စုလီၣ်ခီၣ်ခိၣ်စရီ (တၢ်ပီးတၢ်လီတဖၣ်, ဟံၣ်ဃီပီးလီတဖၣ်, ဒ်န့ၣ်တဖၣ်) န့ၣ်လီၤ.
• ပှၤသမံသမိးတၢ်တဖၣ်န့ၣ် တထီၣ်လၢဟံၣ်ခိၣ်ဒူ မ့တမ့ၢ် တနုာ်လီၤလၢ တၢ်စွါလဲၤတၢ်အလီၢ်တဖၣ်ဘၣ်.
• ဘၣ်သ့ၣ်သ့ၣ် အဝဲကဒိတၢ်ဂီၤတဖၣ်လၢ ဟံၣ်ပူၤဒီးဟံၣ်ချၢဖဲ တၢ်သမံသမိးတၢ်မၤကျဲအပူၤန့ၣ်လီၤ.
• လၢတၢ်အိၣ်သးတဖၣ် ဖဲတၢ်နုာ်လီၤလၢဟံၣ်ပူၤမ့ၢ်တသ့ဘၣ်န့ၣ် ပှၤသမံသမိးတၢ် ကထံၣ်လိာ်သးဒီးပၢဆှၢတၢ်မူဒါခိၣ် လၢတၢ်လီၢ်အဂၤတလီၢ် ဒ်သိးကပာ်ဂၢၢ်ပာ်ကျၢၤ နီၢ်ကစၢ်တၢ်မ့ၢ်တၢ်, တၢ်ဟံးန့ၢ် ဒီး/မ့တမ့ၢ်အတၢ်ကဲဟံၣ်ကစၢ်န့ၣ်လီၤ.

ဖဲတၢ်သမံသမိးတၢ်အဝံၤန့ၣ်

တၢ်ဂ့ၢ်တၢ်ကျိၤလၢ တၢ်ထၢဖှိၣ်အီၤဖဲ တၢ်သမံသမိးတၢ်န့ၣ် မ့ၢ်နီၣ်ထိၣ်တဘျုးခါအကျါတမံၤလၢ FEMA စူးကါဒ်သိး ကဆၢတဲာ်တၢ်ဖျိးစိကြၢးဘၣ်လၢ တၢ်မၤစၢၤအဂီၢ်န့ၣ်လီၤ. နမ့ၢ်အိၣ်ဒီးတၢ်သံကွၢ်တဖၣ် ဖဲတၢ်သမံသမိးနဟံၣ်အဝံးန့ၣ် ဝံသးစူၤဆဲးကျိးဘၣ် FEMA တၢ်မၤစၢၤလီတဲစိကျိၤလၢ 800-621-3362 တက့ၢ်.

FEMA ကဆှၢလီၤတၢ်ဆၢတဲာ်လံာ်ပရၢဆူနအိၣ် ခီဖျိလံာ်တၢး ဘၣ်ဃးတၢ်ဖျိးစိကြၢးဘၣ်ဒီးတၢ်မၤစၢၤအဂီၢ်န့ၣ်လီၤ. ကဒိးန့ၢ်တၢ်ကစီၣ်သီတဖၣ် ဒီးတၢ်ဘိးဘၣ်သ့ၣ်ညါတဖၣ် ချ့ဒိၣ်ထီၣ်အဂီၢ် အိးထီၣ်ဆဲးကျိးန့ၢ်တီၤ DisasterAssistance.gov အကီးတခါဖဲ နပတံထီၣ် FEMA တၢ်မၤစၢၤအဝံၤန့ၣ်တက့ၢ်.